مع بعض نحاربهم

مساء الخير ..

مادري المفروض احط صورة للموضوع بس احترت صراحه احط صورة منو .. يمكن من الموضوع بتعرفون الصورة الي بتنحط ..
الوضع الي صاير هالفترة بالديرة , مضحك .. والله العظيم مضحك ! مضحك ليش ؟ من فكاهته هالموضوع , لكن من غباء من يتناولونه ..
موضوع الوحده الوطنيه الي الكل هاب فيها هاليومين .. شي ينرفز الواحد بصراحه !
شـ هالوحده الماصخه الي بيخربها الجويهل .؟!! او بيّاثر عليها الفالي .؟ او يولعها العريفي .؟!!
شنو انتوا وشلون قاعدين تقيّمون هالموضوع بسذاجه واثارة ..
النواب والصحافه " ورجل الكرسي " طبعا رجل الكرسي هي الحكومه , وهي مفرده شاميه تقال للرجل الي يقعد بالبيت تحسّه شي وهو لا شي ..
محاوله اشعال البلد والبعض الي يحاول يطبّل لها المفروض احنا نتصدى لهم , احنا المدونين الشباب الواعين مانسكت ع الخبال الي قاعد يصير , والعبث فينا ,

انا بدوي درست مع حضري وشيعي وعادي الوضع , وتخرجت وزاملت حضري وشيعي وعادي الوضع .؟!
من متى صار العريفي او الفالي او الجويهل بيخربون شي انبنا فينا وانزرع من زمان .؟!
العتب هني ع النواب الي لا سمعو كلمه مني كبّروها مني , وهاات طق .؟ على شنو .؟
منو الفالي عشان اخسر اخواني السنه عشانه .؟ او منو العريفي عشان اخسر اخوي الشيعي عشانه ..؟ ومنو الجويهل عشان يسبب حزازيه بين البدوي والحضري .؟!

في وقت العالم يتطوّر احنا لا زلنا نتراجع للاسف .؟!
لازلنا نحاول نحدد مفهوم الكويتي شنو .؟ ومفهوم المسلم شنو .؟
وهذا غلط , الخلاف السني الشيعي عقائديا موجود لكن منو احنا عشان نحله ؟!
ابن تيميه شيخ الاسلام عند السنه كان يتجادل مع علماء الشيعه وما وصلو لـ حل .؟
جايين انتوا بعد الالف سنه بتحلونها .؟!
انتوا بالوعه بمشرف ماعرفتو تسكرونها .؟
احنا بمرحله تاريخيه الحين , النفط مو دايم العالم حولنا يتطور , واحنا محلك سر .؟ شيعه وسنه \ كويتي ومزدوج .؟!
انا ما اطالب جهابذه الديمقراطيه عندنا بهالكلام لانهم اصلا ما يبون يسمعونه .؟!
انا اكلم العقلاء والعقلاء فقط ..
ياشباب كلنا كويتي الجنسيه وعندنا قانون يكفل لنا حرياتنا وشعائرنا ..
نحاول ما نجرح بعض او نستفز بعض , نحاول ما ندخل احد برا الديرة علينا ويسوي خلاف بينا ..
نحاول نعيش بسلام .. نبي سلام .. ابي اقرا الجريده وانا ابتسم ..
كلنا بنموت باجر وبنندفن يم بعض بتراب واحد .. وقتها هالتراب ماراح يقول هذا شيعي ما ابيه .؟!
بالعكس راح يحتضنا ويلمنا .. ويمكن يعاتبنا ويلومنا على لاي سويناه بالديرة ..

مع بعض نحاربهم , نرفضهم .. نمنعهم ..
كل الي يحاول يصور لنا انه حرب اهليه بتصير ..
لان اذا بتنطرون رجل الكرسي .. والله بناكل تبن وهو ماقام من كرسيه ..
تكفون الديرة

الجمال لا يعرف وطن ..

الجمال لا يعرف وطن ..


سابقا , في بدايتي كنت دائما احب الانتماء الى جميل من تلك الجماليات الموجوده في حياتنا ..
احاول دائما ان اكون أُحادي الهوى في كل شي ..
عشقت كاظم وحده واصبحت لا اسمع سواه , عشقت نزار قباني واصبحت لا اقرى لـ سواه , عشقت بدر بن عبدالمحسن ,
فـ اصبحت اسير لهم ..
يوم عن يوم بديت اكبر وبدت افاقي تتوسع شوي ..
سمعت عبادي الجوهر بعد من نصيحه من صديق .. فتح لي افاق اخرى , كاظم كان يدخلني الى اجواء معشبه متحضرة متمدنه , موسيقى الاوربيين السابقين , موسيقى كلاسيك كنت اتخيل نفسي لما اسمع كاظم قاعد بمسرح موزارت في بلجيكا ولابسه رسمي كرفته وحركات والي معاي شياب وجذي شي يعني خيال .. كنت اعتقد ان هذا كل الجمال واجمله ..
طبعا انا كويتي , شخصيتي تظل صحراويه محافظه جامده شوي ,يعني لما كاظم يقول " والتقينا بموعد اخر من جديد , كراسينا من حديد , مشاعرنا من جليد .. من غزلنا المفتعل ... وردي ووردك ذبل "
انا هني احاول اتخيل هالشي ببالي , لانه مو موجود بواقعي كلش , فـ احس كاظم يدخلني عالم اخر مو شايفه ..
, عبادي الجوهر غير شوي ..
عبادي يدخلنا اجواء صحراويه , اجواء ضاعت في زحام الحياه المركبه الي اعيشها حاليا , اممم ادري ان جدي كان يعيش بالصحراء لكن انا اعيش في بيئه مختلفه حاليا , لكن يظل بالقلب شي يحن للماضي ,
فـ عبادي لما يغني "
عطشان اسمع عطشان .؟ عمري الصحاري والاسى , بعمري انا ما مر .. على عمري مطر ..
من وين ابتدي والدنيا صحرا وبس .؟!!
النار تحتي , وفوق عيني الشمس .؟!!
"

قسوة الصحراء , بعذوبه الرجل الصحراوي ..
فـ اكتشفت اني انتقل من جمال .. الى جمال ..
من باقه ورد .. الى اخرى ...
انا سقت المثال الي فوق وبديت اخلي نفسي جذي ..
ونزعت عن نفسي أحاديه الهوى ..
صرت اتجول بكل فضاءات الاهواء , ابحث عن جمال ..
بشاركم فيها ..
وبقولكم اسماء اكتشفوها ..

1- نصير شمّه ..
2- بدر شاكر السياب ..
3- فاروق جويده ..
4- ياني ..
5- وعد البحري " صوت من الجنه "
6- سعد الحريّص ..
7- إيمان مالكي ..
8- Kseniya Simonova , كيسينا سيمونوفا ..
9- سليمان المانع ..
10 - ريشار رونييه

حاولت اني احط لكم اسامي غير مشهورة بكثرة عشان تعرفون معاي معنى الانتقال مِن جمال .. الى جمال ..
كل اطواق الجمال الى اعناقكم اهديها : )*
وتصبحون على خير ..

الخطه الجديده للتنميه .. 125 مليااااااااااااااااار

السلام عليكم ..

الشيخ احمد الفهد اعلن اليوم انه مجلس الامه وافق على الخطه الخمسّيه للتنميه ..
واهي خطه يعني بتقلب البلد فوق تحت من مشاريع واحلام للشباب الكويتي الطامح انه يشوف ديرته باحلى ثوب , وع فكرة الشباب الكويتي والله ما يبي شي بجيبه ولا يبي حتى يتوظف او يستفيد من هالمشاريع مجرد يمر بسيارته ويشوف بيرتاح نفسيّا ..
المهم انه الخطه تاريخا مفروض دستوريا ان الحككومه بكل مجلس تقدمها .. اوكي ..
لكن الحكومه ما قدمتها من 1981 جنه .. جنه وايد مو .؟ والمجلس الظاهر ناسي هالشغله وتو تذكرها ..
هم ما ماعلينا ..
واي بعد بقولكم شغله .. الخطه هذه يقولون على ذمه الناقل انها بتكلف الدوله 125 مليار دولار , رقم مخيف صح .؟!!
واالله انا اشوف الحكومه استعجلت شوي يعني شفيها 5 مليارات .؟ والله تكفي ..
لكن شكلها الدوله بتسوي بلاوي بالديرة ..
يعني مثلا ممكن الدوله تنقل شارع الخليج للصبيه .؟! عاادي تقدر فلوس وايد ..
اممم وبعد تقدر تزرع ع الاقل ربع المساحه الصحراويه بالبلد اممم تقدر ليش لا .؟
لا لا ياشباب صج الديرة يقولون زارعين شجر بين الشوارع والدوارات وكل شوي ميت لكن بالفلوس هذه يقدرون ..
اهم بعد تقدر الحكومه تسوي الديرة طوابق مو طوابق طوابق لكن جسور فوق جسور ..
يعني مثلا عمي يقول ان متعته يقعد ع دريشه الدور الثاني ببيته باليرموك عشان يستمتع بالزحمه الي ع الدائري هوايه غريبه بس بتروح عليك ياعمي ..


وايد وايد شغلات تقدر تسويها الحكومه بالمبلغ ..
لكن انا اقص ايدي وع قوله الشامي احلق شنبي , اذا تغير شي كثير .. لكن بقولكم جم شغله وتذكروها ..
بيقولون انها بطلوا مستشفى جابر الاحمد , وهالمستشفى من 5 سنين يشتغلون فيه , يعني ما يصير يدخلون هالشغله مع الخطه .
بعد بيقولون افتتاح استاد جابر , وهذا سالفه بروحه ياشباب يعني شي لا يصددق !!!!!!!
بعد بيقولون افتتحوا جامعه الكويت " اذا افتتحوها " لكن هم الجامعه كانت لها ميزانيه خاصه مالها شغل ندخلها هني .
هم بيقولون افتتاح مدينه صباح الاحمد , هم هذه لها ميزانيه من قبل وعقدها موقع من سنه وشي ..

الزبده يا شباب افهموا السالفه الـ 125 مليار دولار تعني مشاريع جديده ما سمعنا فيه ..
لكن اذا ادخال هذه المشاريع القديمه بالخطه اليديده ..
معناه ياشباب سم بالله وسرقه اخرى ,

طبعا كلامي هذا ان شفتوا شي من الـ 125 مليار ..
يعني في احتمال ماتشوفون شي بعد .. وتروح مثل ما راحت الي قبلها ..

روسيا تسحرني ..

دائما , اعشق روسيا ..
لا اعرف سبب معين , سوى اني اراها غامضه ..
لكنها رغم ذلك , استطاعت روسيا ان تكون رقم صعب في العالم على مدى تاريخي طويل ..
روسيا القياصرة ..
تشغل ربما ربع مساحه العالم وتعتبر اكبر دوله بالعالم ..
نظامهم العمراني فريد من نوعه , طريقتهم في الادارة ملهمه ..
قوتهم العسكريه تشدّك , ثقافتهم مغريه .. والكثير ..

ودي اسافر لها .. من زمان افكر بمشروع سفرة هناك , لكن مادري يقولون الامان هناك مش ولا بد ..
لكن بحاول اوريكم شوي من ما تملك روسيا ,,

ثقافيا , تعتبر روسيا الاب الروحي لـ فن الباليه الراقي : )*
رقصه الباليه اكثر من مجرد رقصه او بنت بلبس مغري تتمايل على انغام هادئه ..
اشوفها اكثر رقيّ , اكثر مخاطبه لـ للنفس الجميل الموجود في داخلنا ..
الاضاءة , الرقص , السمّو , تطير الراقصه امام عينيكٍ مثل ما تطير الريشه بالهوا ..
ومدام ذكرنا الباليه .. نذكر معاه مسرح بولشوي

هنا , الفن يتعتق ...
مسرح للفن فقط , هٌنا عزف شايكوفسكي اجمل معزوفاته بحيرة البجع ..
وهنا رقصت اجمل راقصات الباليه في التاريخ آنا بافلوفا ..
وفيه ايضا واصلت مايا بليسيتسكايا الرقص حتى وصلت لـ 60 من عمرها ..
يبلغ عمره اكثر من 180 سنه .. ويقع في العاصمه موسكو

قصر الكرملين ..


جنه رسمه صح .؟ والا رسوم متحركه سندباد وجذي ..
قصر قديم كان يستخدم للقياصرة لـ اتخاذ قرارات الحروب ..
تحول فيما بعد الى القصر الرئاسي الروسي , هو الاول في الاهميه في موسكو , يليه قصر الدوما وهو مخصص للبرلمان الروسي ..

سانت بطرسبرغ ..


هي مٍن اجمل المدن في العالم واكثرها تاريخيه وترف ..
بناها بطرس الاول في عام 1706 كـ نافذه على اوربا وتعتبر من اهم المراكز الثقافيه في القارة , لانها تحتوي على العديد من القصور بالاضافه الى متحف الارميتاج الثري ثقافياً
..
طبعا ما احتاج اذكر الانجازات العلميه لـ الروس , يكفي انهم اول من اخترع الاقمار الصناعيه ووصل للفضاء ..
.... بس بقولكم معلومه ..
يقولك ايام الاتحاد السوفيتي ..
وف ياليوم الوطني للجيش الاحمر الي اهو جيش السوفييت , تقدم ستالين رئيس الاتحاد السوفيتي لـ زيارة الجيش الروسي المرابط في صحراء سيبيريا الثلجيه , و اول ما وصل ويب يبدا لـ القاء كلمته , ادى التحيه العسكريه للجيش امامه وادى الجيش التحيه له , لكن كان وقتها تساقط ثلوج كثيف .. وغضب الرئيس لانه لم يرى تحيه الجنود له ..
فـ طلب من قائد الجيش انه يشوف حل للثلج المتساقط , وبعدها بعام .. اتى الرئيس لـ نفس المكان واستطاع الجيش الروسي اكتشاف غاز معين يستطيع ان يوقف ويبخر الثلج في السماء من اجل ان يرى رئيس الاتحاد السوفيتي جنوده وهم يلقون التحيه العسكريه له ..

طبا هالسنه ايضا في موسكو طبقوا هذا الاختراع وكانت اول مرة بالتريخ موسكو تشتي بدون تساقط كثيف للثلوج ..

والى الان ما اعرف سبب عشقي لها ..
بس بجد تعشق ..

بحيرة البجع لكم .
[YOUTUBE]Fl1OGWfkErg&feature[/YOUTUBE]
http://www.youtube.com/watch?v=Fl1OGWfkErg&feature=related

إفتتاح \

نفتتح اليوم معاكم مدونتي الثالثه ,
امممم يمكن تستغربون , 3 مدونات لـ شخص واحد , اكيد بتقولون اممم شخص فاضي ...
اممم وانا فعلا فاضي , دوام ! دوامه الرسمي انك ما تداوم . : )*
اممم فراغ هائل , لاتستطيع ان تمليه مجمعات الكويت , هي فيها غير المجمعات .؟
اممم هذه المدونه بتكون نافذه , او بالعربي للسوالف .. امم من انقطعت علاقتي بالمنتديات واتجهت للخواطر والشعر , حسيت بحنيه للكتابه ,خصوصا ان السقف هنا مفتوح لـ ابعد مدى فيني ,
إن شاءالله تعجبكم سوالفي , ولاتنقطعون عن المرور هني ,
خو مو بس انا قلبي متروس ..

مادري شراح اوصف هالمدونه , اممم بس بتكون سياسيه \ اجتماعيه \ غنائيه ثقافيه ..
وع فكرة بخصوص غنائيه محبي راشد الماجد بيتعبون معاي شوي : )*


وقواكم الله